Bygdeutviklingsprisen til Telespinn AS

Det var stor stas da Telespinn AS på fredag fekk BU-prisen for 2012. Spinneribedrifta i Svardal fekk overrekt diplom, blomster og ein sjekk på 50 000 kroner under avslutninga på gründerveka i Telemark. 

Kompetansemekling og FoU-prosjekt, gjennomført av Telemarksforsking i 2007, har medverka til at spinneriet blei realisert i 2008, og at verksemda nå har seks tilsette.  I gardspinneriet på Midt-Svartdal i Seljord kommune bearbeidar Telespinn fiber og ull frå mohairgeiter og spælsau til vakkert og fargerikt garn.

Prisutdelaren la vekt på at dette er ei bedrift som tek vare på heile verdiskapinga, frå mohairgeiter i kulturlandskapet og til ferdige garnprodukt. Kombinasjonen av naturressurser, kultur og moderne teknologi har gjort Telespinn og Midt-Svartdal til ei spanande opplevingsbedrift, med kulturformidling og omvisning for grupper som besøker garden.

I takketala sa dagleg leiar, Bjørg Minnesjord Solheim, at Telemarksforsking hadde vore ein viktig og god støttespelar gjennom planleggings- og realiseringsfasen av opplevingskonseptet.